بسم الله الرحمن الرحيم
ابناء هذا الوطن العظيم الموضوع خطير جدا ولازم تبصوا علي الملاحظات دي وهتعرفوا ان فيه تشابه بينها علشان تتأكدوا ان فيه مؤامرة علي مصر ولازم نصحي لها(ربنا يمسيك بالخير ياسبايدر):
*مبارك اول مامسك الحكم قال انا هقعد فترتين بس ومع ذلك مسابهاش الا بخلع الضرس
*عصام شرف أول مامسك الوزارة قال انا لو لقيت حاجة غلط هاستقيل في الميدان ومع ذلك........انسي
*الببلاوي وزير المالية وعمرو حلمي وزير الصحة كانوا قايلين ان هما هيستقيلوا ويرجعوا للميدان لو الثورة ماحققتش اهدافها ومع ذلك.....زي عصومة بالظبط
*المجلس العسكرى بعد الثورة علي طول قال انا هسلم السلطة بعد ست شهور ومع ذلك عمال يمط في المدة والله أعلم ايه اخرتها
*الاخوان من اكتر الناس اللي عايزين يمسكوا البلد لكن من ساعة ماقعدوا مع عمر سليمان فيه شئ غريب في رد فعلهم بعد الثورة...ومش مستبعد ان هما لسة بيقعدوا مع المجلس العسكري لحد دلوقتي
*الاحزاب اللي كانت بتطالب بالقايمة النسبية ورفع قانون الطوارئ ومنع المحاكمات العسكرية وماليين الدنيا بصوتهم راحوا قعدوا مع المجلس العسكري ونسيوا الحاجات دي كلها ومضوا علي عهدة كمان
*العوا وممدوح حمزة وابو العلا ماضي بقوا محامين عن المجلس العسكري ومؤيدين ليه بعد ماكانوا بينتقدوا سياساته وده كله بس بعد اجتماعهم معاه
*الخلاصة ان كل اللي بيروح يقابل المجلس العسكري بيرجع يقول كلام غير اللي كان بيقوله قبل مايروح
الموضوع هنا مش تشكيك في حد،الموضوع اكبر من كدة .. فيه مؤامرة علي مصر وراها اسرائيل وقطر وحماس وايران وامريكا والماسونيين الاحرار(مش المصريين الاحرار) وحزب الكنبة اللي وراه افغانستان،مصر بتتعرض لمؤامرة كبيرة ،ياجماعة الكراسي اللي موجودة في مقر المجلس العسكري مستوردة من برة(هو فيه حاجة بتتصنع في مصر؟؟؟)والكراسي دي مزودة بتقنية عالية جدا وبتدرس عقلية الشخص اللي قاعد عليها وبعدين بتطلع غاز يأثر علي افكاره والله أعلم ايه طبيعة الغاز ده...المعلومة دي موثقة (موثقة هنا معناها ان انا واثق فيها) والملاحظات اللي انا قولتها فوق دي بتأكد كلامي،الكراسي دي كانت موجودة في مقر رئاسة الجمهورية من زمان وبعد الثورة اتنقلت للمجلس العسكري.انا اتهددت بالقتل اكتر من توفيق عكاشة بسبب نشري للكلام (رغم أني أول مرة أنشره) لكن مصر هي اللي باقية.
انتبهوا يامصريين ماحدش يروح المجلس العسكري علشان مايتحولش،المجلس العسكري فيه سم قاتل ،ولازم ندمر الكراسي دي قبل ماتأثر علي الشعب كله،انا بحذركوا للمرة الاخيرة ،بحذركوا تاني اللهم بلغت اللهم فاشهد.
ليست هناك تعليقات:
إرسال تعليق