- "صوتك باطل..يبقي صوتك رايح
لشفيق"...يقول المرسيون
"صوتك باطل..يبقي صوتك رايح لمرسى"..يقول الشفيقيون
والحقيقة أن كلا الفريقين يعتقدان أننى اذا
صوت سأصوت لمرشحهم بالتأكيد...
-"خلافنا مع الاخوان سياسى وخلافنا مع
شفيق جنائي"
والحقيقة أن خلافى معهما ثورى،ايهما سيحقق
اهداف الثورة واولها نقل مصر الي دولة مدنية ديمقراطية تحترم مبدأ تداول السلطة
وحكم القانون.
-"احنا جربنا الاخوان فى مجلس الشعب
وشفنا ازاي اخلوا بوعودهم بعد الانتخابات وازاي كانوا بيتكلموا باستعلاء وازاي باعوا
اللى في الميدان "....يقول الشفيقيون
"احنا جربنا نظام مبارك 30 سنة وجربنا
شفيق ايام الثورة وهو متورط فى موقعة الجمل وقتل الشهدا وتهريب الاموال
"...يقول المرسيون
-"انتخاب مرسى معناه انتخاب مكتب
الارشاد ".....يقول الشفيقيون
"انتخاب شفيق معناه انتخاب المجلس
العسكرى "....يقول المرسيون
-فوز شفيق معناه ان مبارك كان صح = الطاغية
يكسب.
فوز الاخوان معناه ان سياسة الاخوان كانت صح
= الانتهازية السياسية تكسب.
-"ماتيجى نجربه ولو ماعجبناش نشيله بعد
اربع سنين"...يقول الشفيقيون
"ماتيجى نجربهم ولو ماعجبناش نشيلهم بعد
اربع سنين"...يقول المرسيون
والنتيجة تعالا قابلنى لو فاكرها بالسهولة دي
ومفيش لسة دستور اتكتب ولا مؤسسات اتبنت واتهيكلت ...ماينفعش امضى شيك علي بياض
لواحد منهم علشان اشوفه هيحبسنى ولا لأ
-"شفيق اتنصل من المسئولية ايام الثورة
وقال انه ماكانش يعرف حاجة عن موقعة الجمل"...يقول المرسيون
"الاخوان اتنصلوا من المسئولية في مجلس
الشعب وقالوا ان مفيش حاجة في ايديهم يعملوها"..يقول الشفيقيون
-"شفيق هيحمى المجلس العسكرى ومصالحه
الاقتصادية ويخليه فوق الدولة والقانون "....يقول المرسيون
"مرسى حيحمى الاخوان ومصالحها
الاقتصادية ويخليها فوق الدولة والقانون"..يقول الشفيقيون
-اللي باع صاحبه مرة سهل يبيعه تانى،واللي
قتل المتظاهرين مرة سهل يقتلهم تانى...والمشكلة ان الاتنين بيقولوا دي اخطاء
سياسية
- صوتى باطل علشان الانتخابات
اتزورت فى الجولة الاولى ولو انتخبت في الجولة التانية معناه موافقتى علي
التزوير...هما قاصدين يجيبولك الاتنين دول قصاد بعض لان الاتنين مكسب للمجلس العسكرى
،شفيق منهم وفيهم والاخوان ممكن يضغطوا عليهم تانى ويخلوهم يعملوا اللي هما
عايزينه
- صوتى باطل علشان ماقدرش ادي الشرعية لواحد
فيهم يعمل فينا اللي هوا عايزه
صوتى باطل علشان الاتنين يعرفوا ان فيه فريق
تالت مش قابل الابتزاز ومش موافق علي الاختيارين ومراقب اللي بيحصل كويس.
- سهل انك تخلع شفيق زي ماخلعت مبارك لكن مش
سهل انك تخلع الاخوان.
- مش هدى صوتى للاخوان لان وراهم تنظيم قوى
جدا بيستميت في الدفاع عنهم وبيقدر يوجه الرأى العام ويتوه الحقايق ويقنعهم
بالحاجة وعكسها زي التبرير ان الاخوان لم يملكوا السلطة التنفيذية علشان يعملوا
حاجة في مجلس الشعب...امال الناس انتخبتهم ليه؟؟؟
لما تطلع فى مظاهرات ضد الاخوان مش بس هتبقي
ضد استقرار الدولة،انت كمان هتبقى ليبرالى متعفن لايريد نشر دين الاسلام فى الارض.
- مش هدى صوتى لشفيق لانى عارف انى في اول
فرصة هطلع اطالب بخلعه،فما ينفعش اديله صوتى علشان اثور عليه بعد كدة.
-شايف ان الحل الانسب دلوقتى مجلس رئاسى يمثل اخوان وسلفيين وليبراليين ويساريين وعسكريين وتبقى فترة انتقالية بجد يتكتب فيها الدستور وتتهيكل فيه المؤسسات وتصاغ علاقتها ببعض من جديد.
ليست هناك تعليقات:
إرسال تعليق